Was passiert unterwegs?
27. Mai Llangollen (Chlan-goff-len)
Zerscht mol, HAPPY Birthday Pap!
Alls gueti zu dim Geburtstag.
Es isch jo scho ewigs her sit i s letschtmol drigschribe ha. Bi sit em letschte mol nieme laenger als 2-3 Tag a eim Ort gsi und oft sind s sehr chlini Ortschafte gsi ohni oeffentlichi PCs.
Ha einigi sehr schoeni Ortschafte gseh ir zwueschezyt, z.bsp. Bishops Castle. Es chlises Oertli aber voll vo Pubs, Gschaefter, Restaurants. E wunderschoeni "Mainstreet" z.tl. mit Kopfsteipflaster, alte Hueser.
A eim Obe hani in BC mis erste Pubkonzert erlaebt. Richtig satte Bluesrock. Wo s Konzert gstartet isch, oepe 9i Zobe, isch no fascht niemer im Lokal gsi. Das hett sich erscht nodisno gfuellt. Am Schluss isch es richtig schoen voll gsi, e gueti Stimmig und dr Altersdurchschnitt wahrschinli ueber 60. Uf jede Fall hett s meh Luet gha ueber 50 als drunder. Aber di haend sich nid lo Lumpe, Sie haend voll Lideschaft tanzt, gfyret und eifach freud gha a dem Obe.
Mitlerwyle hani ungefaer 220 km uf em Waeg zrugg gleit, oepe 60 km fehlet no. Ab morn gohts wider wyter nachdem i Sit em Mo da bi gsi idem Staedli. Es werdet vermuetlich no 5 Wandertaeg sii bis i am Ziel achum. Wahrschinli negst Sa oder So (in 1 Woche). Drnoh gilts denn scho langsam Abschied zneh vo Wales und mini letschti Woche do z plane. Wird vermuetlich no e paar Zufgahrte underneh, ua. mit ere Dampflocki, ev. s eint oder andere alte Gemaeuer go aluege und mi letscht WE denn im gliche Doerfli zsi woni au gstartet bi (in Chepstow). Det chunt denn no e Highlight woni mi scho sit em buche vo dr Reis druf freu. Wales hett sich zum erste mol ir Gschicht fuer e Fuessball EM qualifiziert und am letschte Sa vor em heigoh haend si eres 1 Spiel, grad nach dr Schwyzer und i wett dae Match imne Pub vollgstopft mit Waliser go luege. Mol luege was drus wird.
Mit em Wandere isches no raecht speziell. Es isch grad umgekehrt cho als is daenkt ha. Bi drvo usgange das dr Start schwirig wird und i denn i dr 2. Haelfti cho zuelegge und denn e bitz schneller underwaegs si. Aber die erschti Haelfti isch vom physische her besser gange als di 2.i. i mues im Momaent sehr druf luege nach jedem Wandertag au wider e Ruhetag izlegge. Wenn is ned mach, chumi am 2. Tag zimli an Ahschlag. I ha denn s Gfuel i chume nid vorwaerts, bi eifach sehr mued, oft au sehr grummlig druff und i cha denn s wandere nid richtig gniesse. Wenn i aber d Ruhetaeg mach chunt mir s ganze vor wien en grosse Spaziergang, alles isch raecht easy, und es fuellt sich sehr liecht ah, s underwaegs sii.
Ha am letschte Wandertag, woni uf Llangollen gloffe bi, eine vo de schoenschte Usblick gha uf dr ganze Reis. Bi es sehr langzognigs Waldstueck druf, oeppe 3-5 km, und chum bini us em Wald dusse gsi, e paar Haarnadelkurvene druf, und denn isch dr ganz Blick ufgange. Rechts e kahli Hugel/Berglandschaft, links es langzognigs, vo sattem gruen bestimmtem Flusstal mit Llangollen am Ufer und in d Haeng iebout. Drzue hett d Sunne praechtig schuhne und es isch richtig schoen warm gsi. I ha denn oberhalbt vonere Flue e pause gmacht und mi versuecht satt zluege a dem Ablick, was aber unmoeglich isch gsi. Au nach 1 h bini nur mit schwehrem Herze wyter gange und hett locker no laenger choenne blibe.
Letscht Mi hani denn e wuerklich unerwartets und sehr spontans Unterfange gha. I bi anes Bruce Springsteen Konzert uf Manchester mit em Shaun und dr Julie. Dass sind sie uf dr linke Syte mit de Wyglaeser in de Haend. Han sie in Knighton troffe, ha mit em Shaun uf dr Stross afo schwaetze, und am Schluss haend si mi spontan zu sich hei zum Znacht iglade und mir hei e wuerkli gmuetliche Obe zaeme verbrocht.
Was isch denn eigentlich mit em Walisisch?
Schwirierig. i wuerd sogar saege seeeeehr schwirig.
I bi in Ortschafte gsi di heisse:
Lanymynech, Glen-Yr-Afon oder Y Waun (di letscht Ortschaft heisst uf Englisch: Chirk statt Y Waun) und Library (bibliothek z.bsp heisst) Llyfrgell oder ei Satz wo raechts vo mim Computer gschribe isch goht oepe folgendermasse:
Defnyddir system hidlo Websense, Bydd bob defnydd o`r rhyngrwyd yn cael el fonitro a`l gofnodi.
KEI AHNIG WAS DAS HEISST!!!
Und Denbigshire Library Service heisst uf walisisch: Gwasanaeth Llyfrgell Sir Ddinbych oder Whar are you looking for? Find the answer, heisst: chwilio am rywbeth? dewch o hyd i`r ateb
Wenn sie rede toents wienen mischig vo Schwizerduetsch, Hollaendisch, Arabisch und ergend oepis total undefinierbarem. Es toend eher rucher und haerter als Schwyzertuetsch.
"Faster then the spring" oder "schneller als dr Frueelig!"
Ei luschtigi begleiterschinig isch d Tatsach gsi dass i mich waehrend de erste ca. 6 Woche immer im gliche entwickligsstadium vom Fruelig bewegt ha. D.h. ueberall woni gsi bi sind die blaue Bluemli am Waeg entlang gsi und d Boim sind immer churz vor em bluehe gsi. Au s andere vo de Natur isch glich blobe z.tl. au no, gegenueber vom Suede eher no hinde noche gsi, so z. bsp. d Laemmli sind teilweise chlinner gsi, dh. sie haend spoeter glammt als d Schof im Fruelig. So bini ich sozsaege schneller als dr Fruelig gloffe und underwaegs gsi.
P.S. Wievill Schof gits oepe in Wales?
12`000`000, meh oder weniger.
Ev isch das scho dr letscht Itrag gsi do uf em blog do ich jetzt sicher 1 Wuche nuemme drzue chume und i dr letschte Woche weis i nonig was i denn wuerkli mach und woni denn bi. Aber viellicht schaff i no eine nach em Acho und em vollende vo dr Wanderig.
Und in 2,5 Wuche bini de scho wider zrugg ir Schwitz.
I freu mi sehr, sehr eu alli wieder z traeffe!!!